Category Archives: Fréttir

Fjarðarheiðargöng: Rannsóknarboranir 2016

Nú eru hafnar rannsóknarboranir vegna Fjarðarheiðargangna.

Verkið felst í borun á tveimur borholum á Héraði, nærri Egilsstöðum og þriggja hola í Seyðisfirði, nærri núverandi vegi í 165 – 470 m hæð yfir sjó. Verkið felst í að bora lóðréttar kjarnaholur, með kjarnatöku og tilheyrandi rannsóknum, auk loftborunar á hitastigulsholum á þremur stöðum.

Gert er ráð fyrir að lokið verði við boranir og frágang eigi síðar en 15.október 2016.

Fjarðarheiðargöng: Rannsóknarboranir

Fjarðarheiðargöng: Rannsóknarboranir

Sumarvertíðin hafin: skemmtiferðaskipsfarþegar strand

Mokstur yfir Fjarðarheiði til Seyðisfjarðar gekk brösuglega í dag því að blásari bilaði og þurfti að loka heiðinni tímabundið, á meðan gert var við hann. Seyðfirðingar máttu ekki við vandræðum á Fjarðarheiði því að í morgun lagðist fyrsta skemmtiferðaskip sumarsins að bryggju; skemmtiferðaskipið Magellan, með alls 925 farþega. RÚV greindi frá þessu í hádegisfréttum sínum í dag.

Skoðunarferðum með Tanna travel var aflýst, en 134 farþegar ætluðu yfir Fjarðarheiði og í skoðunarferð kringum Lagarfljót með viðkomu í Skriðuklaustri og Snæfellsstofu Vatnjökulsþjóðgarðs. Búist er við að veður geti versnað aftur á Fjarðarheiði þegar líður á daginn og til stendur að skipið haldi til Akureyrar klukkan fimm.

Ófært á áttunda degi sumar: Myndskeið frá RÚV

Fjarðarheiðargöng: Bættar samgöngur og aðgengi að heitu vatni

Í frétt RÚV 25.apríl var rætt við forstjóra RARIK um mögulega lokun á fjarvarmaveitu á Seyðisfirði. RARIK er í talsverðum vandræðum með fjarvarmaveituna á Seyðisfirði og forstjóri RARIK, Tryggvi Þór Haraldsson, segir að fyrirtækið sjái í raun ekki mikla framtíð slíkum veitum.

Í vor mun RARIK hefja könnunarboranir eftir heitu vatni á Fjarðarheiði í samstarfi við Vegagerðina, sem undirbýr möguleg Fjarðarheiðargöng.

Litlar vonir eru taldar á því að heitt vatn finnist eða að varmadælur dugi til að halda kerfinu gangandi fyrir Seyðfirðinga. „Nú þriðji kosturinn er síðan að ef það verða göng upp á Hérað; að menn tengist bara Hitaveitu Egilsstaða og Fella. Ef að það lægi fyrir og ákvörðun um slíkt,“ segir Tryggvi þór.

Hinum megin við Fjarðarheiði eru Héraðsbúar með bæði heitt og kalt vatn handa Seyðfirðingum og gætu göng haft mikil áhrif á líf Seyðfirðinga, ekki bara með bættum samgöngum heldur einnig aðgengi að heitu og köldu vatni.

Bókun bæjarráðs 17.febrúar 2016

Miðvikudaginn 17.02.16 kom bæjarráð Seyðisfjarðar saman til fundar á skrifstofu bæjarins að Hafnargötu 44. Þar var eftirfarandi bókað:

2. Samstarf sveitarfélaga:
Fundargerð 3. fundar samgöngunefndar SSA starfsárið 2015-2016 frá 11.02.16. Lögð fram til kynningar. Gestir fundarins undir öðrum lið voru Hreinn Haraldsson vegamálastjóri, Sveinn Sveinsson svæðisstjóri og Sigurbergur Björnsson skrifstofustjóri í innanríkisráðuneytinu. Í máli vegamálastjóra kom m.a. fram að í ár eru fjárheimildir til framkvæmda við öryggisaðgerðir á Seyðisfjarðarvegi sem farið verður í fyrir 100 milljónir króna og í rannsóknir til undirbúnings Fjarðarheiðarganga sem nemur 150 milljónum króna.

7.Fjarðarheiðargöng – Fundur vegna undirbúnings Fjarðarheiðarganga 16.02.16. Til fundarins mættu Sveinn Sveinsson svæðisstjóri Vegagerðarinnar á Austurlandi og Gísli Eiríksson forstöðumaður jarðgangadeildar Vegagerðarinnar til að kynna bæjarstjórn Seyðisfjarðar undirbúning áframhaldandi rannsókna á Fjarðarheiði vegna Fjarðarheiðarganga. Á fundinum var fjallað um nauðsynlegar breytingar á aðalskipulögum sveitarfélaganna sem liggja að framkvæmdinni. Þá kom fram að fyrirhugað er að bjóða út rannsóknir við möguleg munnastæði í mars nk.  og áætlað er að rannsóknum verði lokið í ár, 2016.

Fundargerðina í heild má finna hér

Fundi frestað vegna ófærðar á Fjarðarheiði

Enn minnir Fjarðarheiðin á sig með ófærð.
Opnum stjórnmálafundi Framsóknarmanna sem halda átti á Seyðisfirði var frestað vegna ófærðar á Fjarðarheiði.  Þingmenn Framsóknarflokksins, þau Líneik Anna Sævarsdóttir, Þórunn Egilsdóttir og Höskuldur Þórhallsson, sem er formaður umvherfis- og samgöngunefndar komust því ekki til Seyðisfjarðar, enda var heiðin ekki verið opnuð (10.febrúar 2016).

Að sama skapi var opnum stjórnmálafundi Sjálfstæðismanna, þar sem þau Kristján Þór Júlíusson og Valgerður Gunnarsdóttir höfðu boðað komu sína, aflýst vegna ófærðar á Fjarðarheiði (11.febrúar 2016).

Að sama skapi má nefna að farþegar Norrænu komust hvorki lönd né strönd, en biðu í góðu yfirlæti á Seyðisfirði, þangað til heiðin opnaðist á ný.ófært

 

Ófærð vatn á myllu Seyðfirðinga í baráttunni um göng undir Fjarðarheiði

Sjónvarpsþættirnir Ófærð hjálpa til í baráttunni um gerð Fjarðarheiðarganga.
Vilhjálmur Jónsson, bæjarstjóri Seyðisfjarðar, segir í viðtali við fréttamann Eyjunnar, það alveg öruggt að þáttaröðin Ófærð sem sýnd er í Ríkissjónvarpinu um þessar mundir sé vatn á myllu Seyðfirðinga í baráttunni um göng undir Fjarðarheiði. Þættirnir gerast á Seyðisfirði og eru teknir upp þar að hluta.

Heiðin er erfið yfirferðar í vetrarveðrum en ófært getur verið yfir hana nokkra daga í senn. Þetta veldur heimamönnum vitanlega ýsmum vandræðum, enda þurfa margir Seyðfirðingar að sækja atvinnu og ýmsa þjónustu yfir heiðina. Fjarðarheiði er eini akvegurinn til og frá Seyðisfirði og liggur heiðin hátt, í um 620 metra hæð yfir sjávarmáli á löngum kafla.

Vert er að geta þess að við frumsýningu á þáttunum var ófært yfir Fjarðarheiði, svo aðstæður þáttarins og umhverfi var ansi raunverulegt þegar Seyðfirðingar sátu yfir sjónvarpsskjám sínum og horfðu á fyrsta þátt Ófærðar.

 

Fjallvegir lokaðir, Fjarðarheiði ófær og akstur bannaður

Ófærð

Tekið af vef Vegagerðarinnar – www.vegagerd.is

Flestir fjallvegir á Austurlandi eru lokaðir í dag og hefur Fjarðarheiði verið merkt ófær og allur akstur bannaður síðan snemma í morgun (2.desember 2015).

Samkvæmt fréttum frá RÚV bíða nokkrir flutningabílar á Egilsstöðum, en þeir eiga að flytja útflutningsfisk sem á að fara með Norrænu frá Seyðisfirði í kvöld. Þeir bíða enn eftir því að komast yfir Fjarðarheiði, en lægja á í veðri undir kvöld. Ekkert skyggni hefur verið á vegum og því ekki hægt að ryðja, samkvæmt starfsmönnum Vegagerðarinnar.

 

 

Þingmenn standa með vilja Seyðfirðinga

Á aðalfundi Sambands sveitarfélaga á Austurlandi, sem haldin var 3.október s.l., var rætt um forgangsröðun jarðganga í fjórðungnum. Á fundinum báðu þingmenn Norðausturkjördæmis bæjarfulltrúa í Fjarðabyggð að rugga ekki bátnum og spilla ekki samstöðu um Fjarðarheiðargöng milli Seyðisfjarðar og Egilsstaða.

Eins og fram kemur í frétt RÚV um málið sagði Steingrímur J. Sigfússon, þingmaður Vinstri grænna og fyrrverandi samgönguráðherra, að þingmenn kjördæmisins væru allir sammála um hvar grafa eigi næstu göng á Austurlandi og sagði m.a.: „óskir Seyðfirðinga eru skýrar; það er að fara undir Fjarðarheiði. Afstaða þingmannahópsins er eindregin og skýr. Við styðjum Seyðfirðinga í þeirri ósk og Vegagerðin vinnur að sjálfsögðu að rannsóknum í samræmi við þetta“.

Í endanlegri ályktun frá SSA eru göng undir Fjarðarheiði sett í forgang en rannsóknir á hinum kostinum einnig nefndar á nafn:
“Aðalfundur SSA, haldinn á Djúpavogi dagana 2. og 3. október 2015, leggur þunga áherslu á þá sameiginlegu framtíðarsýn að byggðir á Mið-Austurlandi, Fjarðabyggð, Seyðisfjörður og Fljótsdalshérað, verði tengdar saman með samgöngum til þess að rjúfa vetrareinangrun og efla framtíðarmöguleika svæðisins sem eins atvinnu-og þjónustusvæðis. Fundurinn telur brýnt að tryggja strax á fjárlögum næsta árs fjármagn til að ljúka nauðsynlegum rannsóknum vegna jarðganga undir Fjarðarheiði á milli Fljótsdalshéraðs og Seyðisfjarðar, sem er forgangsverkefni í jarðgangnagerð á Austurlandi, enda aðstæður íbúa á Seyðisfirði slíkar á vetrum að ekki verður við það unað lengur. Þá þarf að ráðast í rannsóknir á öðrum gangakostum, á milli Norðfjarðar og Seyðisfjarðar um Mjóafjörð. Lögð er áhersla á að við gerð og uppsetningu samgönguáætlunar og gerð fjárlaga verði jarðgangagerð og rannsóknir vegna þeirra fjármögnuð með sérstökum hætti þannig að aðrar mikilvægar framkvæmdir í samgöngumálum landshlutans dragist ekki sökum fjárskorts”

Í Hádegisfréttum RÚV 6.október 2015 má hlusta á frétt um málið, en fréttin hefst á 17:55 mínútu.

Samanburður hugsanlegra samgöngumynstra. Firðir tengdir saman með jarðgöngum auk tengingar upp á Hérað, annars vegar með göngum undir Mjóafjarðarheiði en hins vegar með göngum undir Fjarðarheiði. Myndin er fengin úr skýrslunni “Fjarðarheiðargöng – Athugun á hugsanlegum munnasvæðum og fleiri þáttum” (2011). Skýrslan var unnin af Eflu verkfræðistofu fyrir Vegagerðina.

Samanburður hugsanlegra samgöngumynstra. Firðir tengdir saman með jarðgöngum auk tengingar
upp á Hérað, annars vegar með göngum undir Mjóafjarðarheiði en hins vegar með göngum undir
Fjarðarheiði.
Myndin er fengin úr skýrslunni “Fjarðarheiðargöng – Athugun á hugsanlegum munnasvæðum og fleiri þáttum” (2011). Skýrslan var unnin af Eflu verkfræðistofu fyrir Vegagerðina.

Mikilvægt að sveitarfélögin á Austurlandi standi vörð um þær áherslur sem þau hafa orðið sammál um

Á fundi bæjarráðs Fljótsdalshéraðs mánudaginn 20. júlí var farið yfir stöðu mála vegna fyrirhugaðrar jarðgangagerðar undir Fjarðarheiði.

Í framhaldi af umræðu um málið var samþykkt eftirfarandi bókun:
„Bæjarráð Fljótsdalshéraðs leggur áherslu á mikilvægi þess að sveitarfélögin á Austurlandi standi vörð um þær áherslur er þau hafa orðið sammála um á sínum sameiginlega vettvangi. Í samgöngumálum var m.a. samþykkt samhljóða á aðalfundi SSA sl. haust að næsta verkefni í jarðgangagerð yrðu Seyðisfjarðargöng undir Fjarðarheiði og að jafnframt yrði sett fjármagn í rannsóknir á gangakostum til tengingar miðsvæðis Austurlands.

Í umræðu undanfarinna daga, m.a. í fjölmiðlum, hefur því verið haldið fram að annað en fagleg sjónarmið ráði för í stefnumótun varðandi gangagerð á Austurlandi. Bæjarráð Fljótsdalshéraðs mótmælir þessu og bendir á að þessi sameiginlega áhersla sveitarfélaganna byggi á gögnum og úttekt viðurkenndra og óháðra fagaðila á þeim valkostum sem eru í stöðunni og unnin var fyrir Vegagerðina.“

Tekið af vefsíðu Fljótsdalshéraðs.

Fjarðarheiðargöng leysa best ótryggar og óöruggar samgöngur Seyðfirðinga

Margrét Guðjónsdóttir, formaður bæjarráðs Seyðisfjarðar, segir í viðtali við DV (Helgarblað DV 17.-20.júlí 2015) að göng frá Seyðisfirði yfir í Mjóafjörð og áfram á Neskaupsstað leysi ekki þann samgönguvanda sem að Seyðfirðingar standa frammi fyrir.
Fjarðarheiðargöng ættu að verða annar leggurinn í röð jarðganga sem tengja firðina á mið-Austurlandi við Hérað, á eftir nýjum Norðfjarðargöngum. Með tilkomu Fjarðarheiðarganga er opið fyrir áframhaldandi gangatengingar innan svæðisins og sem seinna geta falið í sér göng sem tengja Norðfjarðar- og Fjarðarheiðargöng saman um Mjóafjörð.

Samanburður hugsanlegra samgöngumynstra. Firðir tengdir saman með jarðgöngum auk tengingar upp á Hérað, annars vegar með göngum undir Mjóafjarðarheiði en hins vegar með göngum undir Fjarðarheiði.

Samanburður hugsanlegra samgöngumynstra. 

Göng undir Fjarðarheiði er sá leggur sem best leysir ótryggar og óöruggar samgöngur Seyðfirðinga til framtíðar og þá erfiðleika sem skapast þegar þjóðbrautin til og frá Evrópu liggur í um og yfir 600 metra hæð yfir sjávarmáli. 
Fjarðarheiðargöng hafa verið sett fremst á forgangslista jarðganga á Austurlandi í kjölfar Norðfjarðarganga . Sveitarfélög á Austurlandi hafa stutt þá forgangsröðun á sameiginlegum vettvangi sveitarfélaga á Austurlandi í ályktunum SSA undan farin ár.